.аНТИблог

Човек

2012-02-17T16:55:00.002+01:00

никогаш од човекот нема да извлечете такво признание што ќе го обвини за животот зашто тој е создаден мал наспрема бескрајната огромност на универзумот тој ја гледа светлата линија на разумот која се издолжува низ епохите но одрекува било каква поврзаност со своето его ако го распнете тој ќе ви го раскаже животот до детали но од тоа нема да извлечете обвинение зашто тој е суштество создадено за слобода

некаков таен сојуз е склучен и човекот знае за него но останува во својата лулка зашто во неа ги сознава времињата минати и времињата идни тој со згрчениот бицепс на спознанието расклопувачот на галаксии оној што тивко ги црта траекториите на планетите по кожата на својот ближен неспокојно лежи во својата лулка и чека магнетните полиња да натежнат на срцевата орбита

ништо од човекот не е направено без дозвола тој е целосно легален ако протестирате тоа ќе го потврди како суштество само за себе ќе потврди дека станува збор за апсолутен човек без исклучоци ако е тажен неговата гранка расте спротивно на гравитацијата и историјата ако се смее неговата гранка натежнува со плодови и ништо не можете да направите околу таквата појава

од лево лежи тигар од десно неговата ампутирана нога која со текот на годините сраснува со постелата ако го покриете преку него ќе се раствори во прав се што сте имале да му кажете зашто тој е неприкосновен косач на фантазијата јавач на мисли гледач на соништа ништо во човекот не е по мерка на божественоста но тој се создава себеси како човек повеќе од човек

Ивица Антески

Што се случува со архивата на А1?

2012-02-17T12:22:00.002+01:00

(a1.com.mk) - А1 Телевизија е во стечај од 26.07.2011 година
А1 Телевизија, како што ја знаевме, повеќе не постои.
Поради тоа, на сајтот не се внесуваат нови содржини.

Сајтот на А1 повеќе не се апдејтува, тоа ок! Нормално, пошто телевизијата веќе не постои... ама што се случува со веќе поставените содржини?

Долг период сајтот на А1 беше еден од најдобро ажурираните сајтови во македонскиот информативен сајбер простор. Содржините што ги поставуваа таму имаат историско значење како документ за еден многу важен период.
Голем дел од блоговите и други сајтови во тој период често линкуваа до содржини на А1, така што во овој момент сите тие текстови кои реферирале на содржини на А1.com.mk губат од својата вредност, односно, не постои можност за проверка на цитираното. (на пример мојот пост „Тие комуњари...“)
Што се случува со брендот на А1? Што се случува со домејнот А1.com.mk? На МАР Нет стои дека сајтот се уште е во сопственост на А1 (лице за контакт е Дарко Пeрушевски). Тие имаат вредност.
Сајбер архивата на А1 треба да се постави на интернет, да ја откупи некоја институција или фондација и да ја постави онлине.

Log update 17.02.2012/21:50ч - Стечајниот управник на телевизијата е назначен од државата. Ако не планира да ја продаде (архивата влегува во имотот на А1), тогаш барем нека му даде државата налог како јавно добро архивата да ја предаде во некоја библиотека или некој историски архив, па преку него таа да и се стави на располагање на јавноста... Ова секако, земено како услов дека за тоа постои политичка волја.

...затвореникот...

2012-02-16T12:34:00.000+01:00

додека администрацијата
смислува нова хуманост
класниот терорист во ќелијата
пронаоѓа генијални
одговори за просечни прашања
адвокатот носи чевли
од нуклеарен отпад во неговиот
лаптоп се складира
генетскиот запис фајл
по фајл полицаецот
го запира тој од
актовката вади пиштол
господине ќе ве застрелам
минувачите во паника
се фрлаат во воздухот
во метежот утрото
пука а ѕвездата паѓа
како метеор
тоа не е петокрака
тоа е личната исправа
биометриската аура на
граѓанинот господине
запрете го внатрешниот
дијалог јас немам
претензии на поинаква
живеачка вели инспекторот
додека неговата жена
му станува лична секретарка
на затворениот терорист
Ивица Антески

Time.mk и јас

2012-02-15T19:03:00.001+01:00

агрегаторот на информациите им дава додадена вредност - секое одвојување на содржините од рекламите е брцање во џебот на медиумите - Чија е рибата? - чекор со политички последици - решението е кој како се договори

Неколку рандом размислувања околу она што му се случи на Time.mk - гледано од страна, како корисник на услугите на сајтот, како новинар и како PR.

1. Ако Time.mk правел пари, тој правел пари поради услугата да им ги собере информациите на читателите на едно место. Тоа е додадена вредност и тоа ја прави заработката. Материјалот така собран вреди малку повеќе отколку расфрлан по разни сајтови.

2. Тој што мисли дека целата аргументација тука завршува нема појма како функционираат медиумите. Еве една ептен поедноставен слика:

Интернет ја направи информацијата бесплатна. Медиумите повеќе не им продаваат информации на читателите/гледачите, туку читатели/гледачи на рекламерите. Значи работа на медиумите е да произведуваат читатели/гледачи и да им ги продаваат на рекламерите. Медиумите произведуваат читатели/гледачи со производство на содржина (информација,забава и сл.) и на рекламерите им нудат можност покрај таа содржина да постават содржина која читателите/гледачите не ја бараат.

Поради ваквите односи, секое одвојување на содржините што ги произведуваат медиумите од рекламите се смета за брцање во џеб и закана по егзистенцијата на медиумите.

3. Медиумите кои се повлекуваат тоа го гледаат вака: си земаат црв (содржините) и одат во лов на риба (читатели/гледачи). Арно ама иде и друг рибар (сајт, во случајов Time.mk) кој нема свој црв, и на нивниот закачува своја јадица. Чија е рибата?
Односите, секако не се толку едноставни како црвот и јадицата, кои се материјални, наспрема кликовите кои се нематеријални, ама тоа е отприлика нивната логика. И таа е оправдана.

4.Дури и да не се броеја кликовите кои идат од Time.mk, агрегаторот им носеше читаност и влијание (едноставно, кога си таму се знае дека те има). Плус, повеќето од сајтовите на медиумите се само продолжение на весникот/телевизијата и не функционираат комерцијално - што значи дека баш им е гајле колку клика имаат и кој им краде кликови (повеќето од оние кои одлучуваат во многу од медиумите немаат појма како ова функционира).

5. Пред да се коментира за било што, треба да се биде информиран за тоа дали навистина Time.mk им носи дополнителни кликови на сајтовите на медиумите - во што се сомневам, пошто некои од линковите ги отвора во фрејм.

6. Не знам дали има политичка намера во чекорот на некои од медиумите, ама ефектите секако имаат политичка димензија. Time.mk стана место каде што добиваш поинаква слика отколку што е доколку ги следиш сите медиуми - затоа, сакал - не сакал ќе морам да почнам (покрај Time.mk и Daily.mk) да го листам и Bukvar.mk

6. Аргументи имаат и едните и другите. Има политика, ама има и бизнис логика. Таквите ситуации во капитализмот се решаваат како што решава скоро за се - седнуваат страните и преговараат. Па секој ќе добие толку колку што испреговарал, а не колку што заслужува.

Update (15.02.2012/19.31) Истата логика која се однесува на Time.mk важи и за прес клипинг агенциите кои дистрибуираат текстови/прилози без рекламите

Манифест на глупоста

2011-09-30T13:48:00.002+02:00

ако можеш нормално да живееш, не си глуп - ако помислиш дека си глуп, се лажеш - никој не е попаметен од тебе - ако нешто не разбираш, не си ти крив - менувај го мислењето само кога си навистина убеден дека имаш погрешен став - се може да се релативизира и се мора да се релативизира - не дозволувај да те манипулираат

НИКОЈ НЕ Е ГЛУП! Ако си способен сабајле да станеш, да се измиеш, да ги измиеш забите, да се облечеш, да заклучиш ко излегуваш од дома и да запомниш дека си заклучил... ако сето ова го правиш без посериозна интелектуална мака - не си глуп. И нема потреба да се сметаш за глуп. И те лаже секој што директно или индиректно се обидува да ти докаже дека си глуп. И се лажеш ако помислиш дека си глуп, зашто не го разбираш некој кога се обидува да ти каже нешто.

МАНИПУЛАНТИ Ако некого нешто не можеш да го разбереш, ако се чувствуваш ментално инфериорен, ако се комплексираш дека има толку работи на светот што не ги разбираш - пак не си глуп. И никогаш немој да помислиш дека ти си крив ако нешто не рабираш, и никогаш немој да помислуваш дека оној што ти зборува е повреден од тебе. Има говорници кои тоа го користат за да те изманипулираат. Има манипуланти кои сакаат да те внесат во филм, за да можат потоа да прават со тебе што сакаат.

МЕНУВАЊЕ НА МИСЛЕЊЕТО И кога не си сигурен дали си во право, држи до своето мислење. Менувај го ставот само кога си убеден дека е поинаку. Никој од нас не е секогаш во право, ни ти. Ама секогаш биди свесен дека не е секогаш во право и секој друг, па и оној што го сметаш за врвен познавач на некоја област. „Врвен познавач“ - не постои таков. За се може да се бара потврда, доказ, за се може да се дискутира, се може да се релативизира. И за се треба да се бара потврда, доказ, за се мора да се дискутира, се мора да се релативизира. Не постојат универзални вистини, дадени еднаш засекогаш. Се мора да подлежи на проверка.

ПОРАКАТА Затоа, биди самоуверен/а. Никој ништо не знае повеќе од тебе и никој нема поголема способност за сфаќање поголема од тебе. Сите сме, фала курцу, горе долу исто интелигентни - разликата ни изгледа огромна, но ако се споредиме со другите суштества на планетава сите луѓе имаат горедолу исто ниво на интелигенција. Ако не ти е нешто јасно, побарај да ти се објасни. Дури и ако за сите испаднеш смешен. Подобро да им изгледаш глуп на сите и да го разбереш она што не ти било јасно, отколку на сите да им изгледаш паметно, а у ствари да бидеш вистински глуп. Не му дозволувај никому да те натера да дејствуваш според информации кои не ти се доволно јасни, само поради тоа што мислиш дека знае повеќе од тебе.

(текстов е првпат објавен на стариот .аНТИблог на 28.12.2005, овде е пренесен во целост без никакви интервенции)

Демократски долари за Египет и Тунис

2011-05-25T13:08:00.005+02:00

(Алсат) 25.05.2011 - Светската банка ќе им одобри на Египет и на Тунис шест милијарди долари кредити, за да им помогне по демократските реформи да ги демократизираат своите економии, изјави претседателот на банката Роберт Зелик.

Во превод читај: Западот ќе ги моделира Египет и Тунис според својот модел на капитализам, зашто според нив само тоа е слободно општество и само тоа е стабилна демократија. Се останато е диктатура, тоталитаризам, заостанато, варварство и дувло на тероризмот.

Тие комуњари...

2011-05-25T10:38:00.002+02:00

„Се создава еден вештачки култ на негирање, кој што треба да докаже на младите дека тие комуњари, тие луѓе, тој систем биле тотална пропаст, нормално од аспект на нашите демократски потреби. Нема за тоа време и за тој систем ниедна позитивна оценка, но за многу важни државни интереси мислам дека историчарите еден ден ќе изречат поинакви оценки“ ~ Васил Тупурковски (25 мај беше ден на младоста на една генерација граѓани)

Толку сонував за тебе

2011-05-25T08:31:00.000+02:00

Толку сонував за тебе што ти ја загуби својата реалност.
Има ли уште време да се достаса тоа живо тело и да се бакне врз таа уста раѓањето на гласот кој ми е драг?
Толку сонував за тебе што моите раце свикнати да се вкрстуваат, во прегрнувањето на твојата сенка, врз моите гради, не би се свиткале околу облиците на твоето тело, можеби.
Толку, што пред вистинската појава на она што ме посетува и ме води веќе со денови и со години јас би станал една сенка, несомнено.
О сентиментални двоумења.
Толку сонував за тебе што нема веќе време за да се разбудам. Јас спијам простум, со тело изложено на сите појави на животот и на љубовта, а ти која единствено постоиш за мене денес, ти имаш чело и усни кои јас би можел многу потешко да ги допрам отколку првите усни и првото чело што ќе наидат.
Толку сонував за тебе, толку одев, зборував, спиев со твојот призрак што не ми остана ништо друго освен можеби да бидам призрак меѓу призраците и стопати повеќе сенка отколку сенката што се шета и ќе се шета пополека по сончевиот часовник на твоето тело.

Робер Деснос

Сеништето на комунизмот...

2011-05-24T12:29:00.008+02:00

Американски антикомунистички постер од 1950 година.

Постерот е преземен од текстов кој зборува за омразата во американското општество.

Најголемите научници не се верници

2011-05-23T12:36:00.003+02:00

„Бидејќи постои закон каков што е гравитацијата, универзумот може и се создава себеси од ништо. Спонтаната креација е причината што постои нешто, а не ништо, зошто постои универзумот, зошто ние постоиме. Не е неопходно да се повикуваме на Господ за да ја објасниме шемата и начинот на кој универзумот функционира“ - Стивен Хокинг

Ова е всушност одговор на неколку дебати што ги имав деновиве со повеќе луѓе. Најголемите научници не се верници, да не се лажеме - само погрешно се толкуваат нивните изјави. За повеќе читање го препорачувам текстот „Stephen Hawking says universe not created by God“.

твојата љубов

2011-05-23T06:19:00.001+02:00

твојата љубов ме напаѓа од заседа како разбојник таа чека надвор од кругот на срцето јас ѝ ги покажувам околните балкони на кои луѓето се кршат од болка и си изјавуваат доживотна верност не јас не ти ја посакувам вечноста кога моите раце би биле бесконечни тоа можеби би имало смисла седнувам спокоен со прашањето до кога ќе трае оваа сезона на лов на срцето ова катапултирано тело што ти се предава безусловно облакот собран во шише цртежот на црнец што сече ногарка на дрвен стол до кога ќе трае изговорот на самогласките протокот на песок низ воспаленото грло на часовникот не јас не ти го посакувам времето доволна ми е твојата љубов

Избори се! Црвен картон за сите!

2011-05-22T20:54:00.012+02:00

гласањето не е само право и обврска, туку и одговорност – клучните цели на скоро сите политички партии се исти - огромно мнозинство кои не се задоволни со тоа како се поставени работите во ова општество

Директна провокација за колумнава е кампањата на Институтот отворено општество која ги повикува граѓаните масовно да излезат на избори. Прво, оваа кампања е насочена против правото на граѓаните да не излезат на избори и со тоа да го кажат своето мислење за актуелната партиска понуда. Второ, оваа кампања јас ја гледам како дел од предизборните активности на опозицијата. И во двата случаи, кампањата е во насока на поддршка на политичкиот систем таков каков што е... а каков е? Хм, корумпиран, полтронски, непотистички, тоталитарен, несолидарен, деградирачки, суров, нехуман...

Гласањето е давање доверба

Секој од нас има право да не излезе на избори доколку смета дека нема некој кој би можел да го претставува. Не само тоа, секој од нас има ОДГОВОРНОСТ за тоа кому му го делегира своето право да одлучува. Гласачкото право не е само право и обврска, туку и одговорност како ќе се искористи. Затоа, сосема невкусно, па дури и недемократски, е некој да прави да се чувствуваш лошо затоа што немаш доверба во некој од понудените партиски кандидати и листи.

Јас не гласам веќе неколку циклуси токму поради тоа што нема политичка партија, програма или кандидат во кого имам доверба. Штом нема опција која ја поддржувам, нема да гласам, тоа е мое право и моја одговорност!

Друга алтернатива е да гласам против онаа партија во која немам доверба. Онака како што прават многумина од оние убедени дека мора да гласаат и покрај тоа што не им се допаѓа понудата. Извинете, ама да му дадеш мандат на некој за кого не веруваш дека спроведува правилни политики е крајно неодговорно.

Едноумие и тоталитаризам

Една од причините поради кои не гласам е едноумието. Не треба да си аналитичар за да сфатиш дека всушност клучните цели на скоро сите политички партии се исти. Тоа е онаа борг-мантра „Сите во НАТО, сите во ЕУ – отпорот е бесмислен!“. Зошто би се секирал која партија е на власт, ВМРО или СДСМ, кога и двете во своите програми за крајни стратешки цели ги имаат НАТО и ЕУ; кога чекорите што ги преземаат и законските акти што ги носат се во таа насока; кога клучните чекори во политиката ги донесуваат со амин на странски политички фактори? Прашањето кој ќе дојде на власт за мене е само прашање на стилот со кој тие политики се спроведуваат.

Оваа марионетска политика е само замачкана со пропагандата дека тоа е наша цел, дека ние сакаме така, пропаганда „не го правиш тоа што го сакаш, туку го засакуваш тоа што мораш да го правиш“. Анкетите со матни прашања на кои има по 99% поддршка за оваа цел се само потврда за ова – секој што е малку посериозен ќе се запраша што не е во ред со анкета на која има толкаво мнозинство за една од опциите.

На крајот на краиштата, ако толку им се важни гласачите, зошто никој не го праша народот на референдум дали тој сака стратешките цели на државата да се ЕУ и НАТО? За влегување во воена алијанса дури има и уставна обврска да се праша народот. Тој референдум го оставаат за на крај, кога народот ќе ги истрпи сите оние сурови реформи кои ќе уништат судбини на многу луѓе... извинете, тоа не е демократија, туку ставање пред свршен чин.

Некој ќе рече „ете ти го Груевски, тој е против ЕУ и НАТО“. Тоа е неточно, Груевски не е против ЕУ и НАТО, тој само игра по линија на помал отпор. Евроскептицизмот и антинато рапсоложението на одредени кругови во владејачките структури не се суштински, туку само реакција на грчкото вето. Тоа е во суштина клон на истата пропаганда „не го правиш тоа што го сакаш, туку го засакуваш тоа што мораш да го правиш“. Сладок лимон.

Стара игра, нов стил

Што ќе смени мојот глас? Ништо, освен ако со тоа не си помогнам да ми се вработи некој член на семејството. Или обратното, ако биде отпуштен што другите дошле на власт. Извинете, ама мене таа логика ми е неприфатлива.

Промените ќе се сведат во лицата кои ја спроведуваат политиката за која зборував. Се разбира, и стилот со кој ја спроведуваат. И немојте никогаш да заборавите, ќе се сменат контата кои ќе се полнат од разни тендери-мендери.

Затоа, мене ми е сосема сеедно кој ќе ги добие изборите. Можам да ги коментирам чекорите кои ги презема оној што е на власт, ама критиката кон едните не е секогаш поддршка на другите.

И, на крајот на краиштата, ако некој друг го заокружи моето ливче уште подобро – уште еден доказ за тоа во каков систем живееме.

Пораката на молкот

Ним не им е гајле што мислиш се додека гласаш, се додека учествуваш во нивната игра, се додека ја правиш возможна. Со неизлегување на избори нивната игра станува невозможна, нелегитимна, разобличена... Системот ќе дојде во политичка криза. Тоа во превод значи дека ќе стане невозможно да се одржи, дека ќе треба да се направат некакви измени.
Со неизлегување на избори ќе кажеш дека не ти се допаѓа системот таков каков што е – дека сакаш поинаков систем. Овде не пропагирам каков би бил тој, туку само дека има огромно мнозинство кое е незадоволно од тоа како се поставени работите во ова општество – луѓе што не знаат што можат да направат околу тоа – прв чекор, не излегувај на гласање, дај им црвен картон!

Ете зошто повикувам да не се излезе на избори. Неизлегувањето на избори е опомена. Нема погласно и потревожно нешто за еден политичар и агитатор од тоа да слушне дека гласачите не сакаат да му го дадат гласот нему, ниту на неговиот опонент, дека ги прозрел и презрел нивните шарени каканици. Дека на системот му дава црвен картон.

Јебеш блог ако не е .аНТИблог

2011-05-21T21:12:00.006+02:00

„Tko vrijedi leti, tko leti vrijedi, tko ne leti ne vrijedi“ - Grunf

Ваљда е тоа некој марфиев закон, ама факт е дека не можеш да ѝ се посветиш целосно на една работа, а притоа да не ги запоставиш сите други. Пред да го запустам скроз, блогов едно време функционираше со по еден до два поста неделно, што у ствари и не е така лошо. Лошо е во споредба со најдобрите денови на .аНТИблог, кога имаше еден до два поста дневно. Ги имам постовите и ќе реобјавувам понекогаш нешто ретро.

Како и да е... Веројатно сум имал други начини да го кажам тоа што сум сакал да го кажам. Сега, пак, осеќам јака потреба пак да блогирам. Разликата меѓу 2005 година кога почна .аНТИблог и сега е што сега секој знае што е тоа блог, а тогаш кога ќе спомнев блог ме прашуваа „Каков блок?“ Плус, сега има Фејсбук и Твитер што се мадафакерчиња за раја.

Да, не е фенси да блогираш, ама никад не блогирав зошто е фенси...

... и така. Се читаме!